Kim at Gerald, naintindihan ni Kuya Germs
Jun Lalin ( Abante-Tonite ) 10.22.09
Nilinaw ni German Moreno na hindi siya na­galit kina Kim Chiu at Ge­rald Anderson nang hindi na mahintay ng mga ito ang German Moreno Achievement Award noong Sunday sa 57th FAMAS Awards Night.

“Nanghinayang lang ako na hindi nila perso­nal na natanggap ‘yung para­ngal na binigay ko sa kanila. Dumating sila sa event, pero hindi ako kaagad na-inform na isang oras ang sila puwedeng mag-stay roon dahil kailangan pa nilang pumunta sa Araneta Coli­seum para sa commitment nila roon,” paha­yag ni Kuya Germs.

“Tumawag pa ako kay Cory (Vidanes, isa sa top executives ng ABS-CBN) para i-explain na hindi ako galit. Baka kasi kung ano pa ang makarating sa kanila.

“Noon kasing paalis na sina Kim at Gerald, saka lang nagsabi ‘yung kasama nilang handler na kaila­ngan na nilang umalis.

“Sabi sa kanila ni Chuchi, isusunod na ‘yung portion nina Kim at Gerald, pero dahil may kumakanta pa, tinapos muna namin ‘yung number na ‘yon.

“Nang umakyat na ako sa stage para i-present sa kanila ‘yung karangalan na ‘yon, ala na sila.

“Nagulat ako at umalis na pala sila, pero naintindihan ko na may iba pa silang commitment.

“Ang sa akin lang, sana, sa akin mismo sinabi na kailangang umalis kaagad nina Kim at Gerald para pagdating nila eh sila na kaagad ‘yung isinalang ko. Pero hindi ko naman alam.

“Habang nasa stage ako, tinawag ko ‘yung mga kasamahan nila sa Star Magic at ibinigay ko ‘yung parangal nila,” paliwanag ni Kuya Germs, na nagwaging best supporting actor sa FAMAS para sa pelikulang Paupahan.