Kuya Germs, inunawa sina Kim at Gerald
Ian F. Farinas ( Journal Online ) 10.22.09

Isa si Kuya Germs (German Moreno) sa special guests sa thanksgiving dinner ni Heart Evangelista para sa FAMAS best actress victory sa Barrio Fiesta sa SM Megamall, nu’ng Martes ng gabi.

Bukod kay Kuya Germs, naroroon din ang Mano Po 6: My Mother producer na si Mother Lily Monteverde, na siyempre pa’y tuwang-tuwa sa pagkakapanalong best actress ng bago niyang artista.

Dahil wagi rin sa FAMAS (best supporting actor para sa Paupahan) at may isyung mangiyak-ngiyak nang iwan nina Kim Chiu at Gerald Anderson ang presentasyon ng German Moreno Youth Achievement Award, in-interview din ng press ang Master Showman.

Paglilinaw ni Kuya Germs, hindi siya galit kina Kim at Gerald.

“Ba’t ako magagalit? Andu’n naman sila, eh, hindi lang nahintay ’yung pagbibigay ng award dahil sabi ng handler nila, may Araneta Coliseum pa sila.

“Tampo? Wala na sa bokabularyo ko ’yung ganyan. Sa tinagal-tagal ko sa industiya, ikaw na lang ang umunawa sa kanila,” sey nito.

Ang nangyari, kuwento ni Kuya Germs, inabisuhan sila ng Star Magic handler ng dalawang young stars na isang oras lang sila puwedeng magtagal sa seremonya at male-late sila ng dating, around 9 p.m.

“Kaya, dinelay pa namin ’yung show. ’Yung handler, pumunta kay Chuchi, ’yung sekretarya ko. Ang sabi, aalis na raw sila dahil mayroon pa silang Araneta. So, sabi ni Chuchi, ‘o sige, sila na ang susunod.’

“Pero, ’di naman puwedeng paalisin mo ’yung kumakanta sa stage. Kaya, nu’ng lumabas na ako to announce the awardees, sabi nu’ng mga tao sa itaas, ‘bumaba na, bumaba na.’

“Ang akala ko naman, pababa na papuntang stage. ’Yun pala, umalis na. Ang ginawa ko, inabot ko na lang sa mga taga-Star Magic na nasa harap ng stage.”

Itong taon lang daw niya ginawa na dalawa ang set of awardees mula sa Kapamilya Network (Kim at Gerald) at Kapuso channel (Aljur Abrenica at Kris Bernal).

Hindi pa raw sila pormal na nagkakausap nina Kim at Gerald, pero personal na tumawag si Kuya Germs sa ABS-CBN exec na si Cory Vidanes isang araw matapos ang FAMAS.

“Nag-sorry siya na may Araneta nga dahil sa Star Magic concert.

Ako na ang nagprisinta kay Cory. Sabi ko, kahit ako na ang pumunta sa ABS, magkita-kita lang kaming tatlo para mahinto na ang intriga.

“Ayoko ng intriga, ’di naman sila nag-walk-out, eh,” katuwiran pa ng beteranong TV host.